प्यूठान । सरुमारानी गाउँपालिकाले ‘किसानसँग गाउँ सरकार’ कार्यक्रमअन्तर्गत सञ्चालन गरेको निःशुल्क पशु स्वास्थ्य घुम्ती शिविर सम्पन्न भएको छ ।

गाउँपालिका पशु सेवा शाखा, बड्डाँडाका अनुसार वैशाख १० देखि १७ गतेसम्म ६ वटै वडामा सञ्चालन गरिएको शिविरबाट ३५० घरपरिवार लाभान्वित भएको शाखा प्रमुख केशब गिरीले जानकारी दिनुभयो।
शिविरमार्फत १३५ भैंसी–राँगा, ४६३ गाई–गोरु, ३ हजार १८२ बाख्रा–बोका, ४ हजार १३४ कुखुरा र १२७ बंगुरको रोगअनुसार उपचार तथा औषधि वितरण गरिएको छ ।

यस्तै, १५ कुकुरलाई रेविजविरुद्ध खोप लगाइएको छ भने १४ बोकाको बन्ध्याकरण गरिएको शाखाले जनाएको छ।

शिविरका क्रममा व्यावसायिक पशुपालन गरिरहेका कृषकका फार्मसमेत अनुगमन गरी सुधार गर्नुपर्ने प्राविधिक पक्षबारे सुझाव दिइएको गाउँपालिकाले जनाएको छ।